Os Bolechas xa están de volta un ano máis para facer as delicias de nenos e nenas. A cuarta edición da xira desta adorable e divertida familia comezará mañá ás 12:00h no Patio do CEIP de Pedrouzos, en Brión, na que será a primeira etapa da súa viaxe en caravana por 15 concellos de toda Galicia.

Nesta ocasión Os Bolechas coñecerán a un misterioso personaxe que, cun saco cheo de probas, retará á familia a realizar «O gran reto deportivo», un desafío no que terán que poñerse forma e dar o mellor de si. Deporte, traballo en equipo e moito humor serán os ingredientes desta aventura sobre rodas.

Esta visita da caravana dos Bolechas é un acontecemento que permite á cativada relacionarse cos seus personaxes preferidos a través do teatro de monicreques, pero ademais realízanse outras actividades complementarias a pé de rúa, como sorteos de libros. Sen perder de vista a diversión que caracteriza a familia Bolechas, a iniciativa pretende espertar a curiosidade e as ganas de aprender, así como fomentar o uso da lingua galega no ámbito deportivo. «O gran reto deportivo» contribúe a fomentar o idioma galego e a importancia de que as nenas e os nenos leven unha vida activa e saudable.  

Este espectáculo ao aire libre está pensado para nenos e nenas de 4 a 9 anos e as súas familias, e busca a participación da rapazada con explicacións, preguntas e probas. Dende o espírito educativo que os caracteriza, Os Bolechas seguirán a promover o uso da lingua e cultura galegas, e a dinamizar o ocio en galego a través da aprendizaxe e o lecer. Esta iniciativa enmárcase dentro do FalaRedes, un programa de dinamización lingüística da Secretaría Xeral de Política Lingüística da Xunta de Galicia.

Unha ruta con 15 paradas

O primeiro encontro terá lugar en Brión, pero está previsto que a caravana dos Bolechas faga outras 14 paradas. Visitarán os concellos de Silleda, Soutomaior, Carral, Bergondo, Cedeira, Paradela, O Grove, Melide, Pontedeume, Burela, Lalín, Negreira, Cee e Teo, onde será o derradeiro espectáculo o 31 de agosto. Estas son todas as datas:

• Brión. Mércores, 16 de xullo. 12 horas. Patio do Ceip de Pedrouzos.
• Silleda. Venres, 18 de xullo. 20 horas. Praza Juan Salgueiro de Silleda.
• Soutomaior. Sábado, 19 de xullo. 20.30 horas: Peirao de Arcade
• Carral. Mércores, 23 de xullo. 18 horas. Campo da Feira
• Bergondo. Luns, 28 de xullo. 12 horas. Edificio cultural A Senra.
• Cedeira. Venres, 1 de agosto. 20 horas. Praza do Floreal.
• Paradela. Luns, 4 de agosto. 11.30 horas. Praza do Centro Multifuncional Xesús Mato Mato.
• O Grove. Martes, 5 de agosto. 20 horas. Praza do Corgo.
• Melide. Mércores, 20 de agosto. 19 horas. Praza do Convento.
• Pontedeume. Xoves, 21 de agosto. 12 horas. Alameda de Raxoi.
• Burela. Venres, 22 de agosto. 20 horas. Praza da Mariña
• Lalín. Martes, 26 de agosto. 20 horas. Praza da Igrexa.
• Negreira. Mércores, 27 de agosto. 20.30 horas. Parque do Coto.
• Cee. Sábado, 30 de agosto. 20 horas. Praza da Constitución.
• Teo. Domingo, 31 de agosto. 17.30 horas. Casa Común de Oza.